HOME / TUISBLAD

Kristian verloor stryd

Leoni Kruger
LEPHALALE — Die 12-jarige Kristian Prinsloo wat Saterdag 8 April deur ‘n volwasse leeumannetjie in Lephalale aangeval is, is Woensdagoggend om 10:50 dood.
Herman en Adri Prinsloo, Kristian se ouers, het dié nuus gedeel op ‘n spesiale Facebookblad wat geskep is sodat terugvoer oor Kristian se vordering verskaf kon word: “Kristian Josef Armand Prinsloo is om 10:50 oorlede. Lief vir jou my seun”.
Kristian se ouers sou Dinsdag 25 April weer met die dokter praat om Kristian se toestand te bespreek en om te hoor “waar hulle met hom staan – medies gesproke”. Die woordvoerder van Medeclinic Muelmed, Sanet Dippenaar, was egter Woensdag glad nie beskikbaar vir kommentaar nie.
Dinsdag 25 April was Kristian se 12de verjaarsdag en verskeie boodskappe van geluk- en seënwense is op sy Facebookblad geplaas. Sy pa, Herman, het die volgende gedeel: “Hemelse Vader. Ons dank U dat U 12 jaar gelede, deur U ongekende genade, vir ons ‘n wonderwerk gegee het met ‘n humor en ‘n laggie wat aansteek soos ‘n verkoue. ‘n Opregte liefde vir sy medemens – bekend en onbekend. Liefde vir die natuur en diere. Here mag hierdie dag gevul wees met U ongekende genade, bo-menslike genesing, seën vir almal wat hy aangeraak het en dat ons U liefde sal ervaar soos U wil hê ons moet mekaar liefhê. Here ons dank U in die wonderlike naam van Jesus Christus. Amen.”
Kristian was die kleinkind van Marie Strydom (75) wat woon op die Waterkloof Landgoed aangrensend tot Lephalale. Die leeu het Kristian in Marie se huis oorval en alhoewel sy probeer het om die leeu van hom af te kry, was sy beserings baie ernstig en is hy na die Mediclinic Muelmed oorgeplaas waar hy sedertdien in die intensiewe sorgeenheid aan ‘n ventilator gekoppel was. Breinskaderings het vroeër bepaal dat daar geen breinfunksie waargeneem word nie en dat daar vog op sy brein was.
Mogol Pos het Woensdagoggend vroeg met Marie, Kristian se ouma, gepraat terwyl sy op pad was na haar kleinkind in Muelmed. Op daardie stadium kon sy net bevestig dat sy toestand onveranderd was en dat die dokters besluit het om van die pype te verander en vir hom nuwe antibiotika te gee omdat hy longontsteking gehad het. Hy is kort na dié gesprek dood.
(Mogol Pos wens Kristian se ouers en alle ander betrokkenes in hierdie tragiese voorval sterkte toe — Red)